నుపుర్ శర్మపై మహారాష్ట్రలోని భీవండి పోలీసులు సమన్లు జారీ చేశారు. మహమ్మద్ ప్రవక్తపై వ్యాఖ్యలు చేసినందుకు బీజేపీ ప్రభుత్వం పార్టీ నుంచి తీసివేసిన విషయం తెలిసిందే. ఈ మేరకు ఆదివారం ఆమె వాంగ్మూలం నమోదు చేసుకుని నోటీసులు జారీ చేసినట్లు పోలీసు అధికారులు వెల్లడించారు. అలాగే మరో బహిష్కృత బీజేపీ నేత నవీన్ కుమార్ జిందాల్‌పై కూడా ఈ నెల 15వ తేదీన స్టేట్‌మెంట్ రికార్డ్ చేయాలని నోటీసులు జారీ చేశారు. మే 30వ తేదీన రజా అకాడమీ ప్రతినిధి ఇచ్చిన ఫిర్యాదు మేరకు నుపుర్ శర్మ, నవీన్ కుమార్ జిందాల్‌పై కేసు నమోదు చేసినట్లు భీవండి పోలీసులు పేర్కొన్నారు.
ఈ మేరకు నుపుర్ శర్మను థానే జిల్లా పోలీసులు కూడా ఈ నెల 22వ తేదీన పోలీస్ స్టేషన్‌కు హాజరు కావాలని నోటీసులు జారీ చేశారు. అలాగే చర్చకు సంబంధించిన వీడియో ఫుటేజీ కూడా ఇవ్వాలని పేర్కొన్నారు. మహమ్మద్ ప్రవక్తపై వివాదాస్పద వ్యాఖ్యలు చేసిన నేపథ్యంలో ఈ నెల 5వ తేదీన నుపుర్ శర్మతోపాటు ఢిల్లీ బీజేపీ మీడియా చీఫ్ నవీన్ జిందాల్‌ను సైతం బీజేపీ బహిష్కరించింది. ప్రపంచవ్యాప్తంగా వారిపై నిరసనలు వెలువెత్తాయి. బీజేపీ పదవి నుంచి సస్పెండ్ చేయాలని పేర్కొంది. ఆ తర్వాత నుపుర్ శర్మ తన వ్యాఖ్యలను వెనక్కి తీసుకుంది. మీడియా ముందు క్షమాపణ కూడా చెప్పింది.
