కాంగ్రెస్ ప్రధాన నేత రాహుల్గాంధీ ప్రధానమంత్రి అవుతారని ఓ స్వామీజీ జోస్యం చెప్పారు. కర్ణాటక చిత్రదుర్గలోని శ్రీ జగద్గురు మురుగరాజేంద్ర విద్యాపీఠ్‌ను రాహుల్ గాంధీ సందర్శించిన సందర్భంగా ఆ స్వామీజీ వ్యాఖ్యలు చేశారు. రాహుల్ గాంధీ శ్రీ జగద్గురు మురుగరాజేంద్ర విద్యాపీఠ్‌ను సందర్శించి మఠాధిపతి శ్రీ శివమూర్తి మురుఘ శరణరు నుంచి ‘ఇష్టలింగ దీక్ష’ను స్వీకరించారు. ఈ విషయాన్ని స్వయంగా రాహుల్ ట్విట్టర్‌లో వెల్లడించారు.
సాధారణంగా లింగాయత్ సామాజిక వర్గానికి చెందినవారు మాత్రమే ఈ ఆచారాన్ని పాటిస్తారు.అ యితే, ఈ క్రమంలోనే హవేరి హోసముట్ స్వామీజీ రాహుల్ గాంధీపై ఆసక్తికర వ్యాఖ్యలు చేశారు. రాహుల్ ప్రధానమంత్రి అవుతారని జోస్యం చెప్పారు. ‘ఇందిరా గాంధీ ప్రధానిగా పనిచేశారు. రాజీవ్ గాంధీ ప్రధానమంత్రి అయ్యారు. ఇప్పుడు రాహుల్ గాంధీ లింగాయత్ శాఖలోకి ప్రవేశించారు కాబట్టి ఈయన కూడా పీఎం అవుతారు’ అని అన్నారు.
అయితే ఇంతలోనే జోక్యం చేసుకున్న మఠాధిపతి శివమూర్తి.. అలాంటి వ్యాఖ్యలు చేయొద్దని స్వామీజీని అడ్డుకున్నారు. ఇది రాజకీయ వేదిక కాదని, ప్రజలే దానిని నిర్ణయిస్తారని చెప్పారు.
హుబ్బళ్లిలో కాంగ్రెస్ రాజకీయ వ్యవహారాల కమిటీ(పీఏసీ) సమావేశానికి హాజరయ్యేందుకు రాహుల్ మంగళవారమే కర్ణాటక చేరుకున్నారు. ఆ రాత్రి జరిగిన భేటీలో.. 2023 అసెంబ్లీ ఎన్నికలకు సన్నద్ధత గురించి రాష్ట్ర కాంగ్రెస్ నేతలతో చర్చలు జరిపారు. బుధవారం కర్ణాటక మాజీ సీఎం సిద్ధరామయ్య 75వ జన్మదిన వేడుకలకు కూడా రాహుల్ హాజరయ్యారు.
