కేంద్ర మంత్రి అమిత్ షాతో సినీనటుడు జూనియర్ ఎన్టీఆర్ సమావేశమవ్వడం తెలుగు రాష్ట్రాల రాజకీయాల్లో కాకరేపుతోంది. షా ఎన్టీఆర్ ని ఎందుకు కలవాలనుకున్నాడనే దానిపై క్లారిటీ లేక చాలా మంది రాజకీయ నాయకులు జుట్టు పీక్కుంటున్నారు. అయితే షా-ఎన్టీఆర్ భేటీపై కేంద్ర మంత్రి కిషన్ రెడ్డి ఎట్టకేలకు క్లారిటీ ఇచ్చారు. అయితే వాళ్లు దేని గురించి మాట్లాడుకున్నారో తెలుసుకోండి మరి.
‘దాదాపు 45 నిమిషాల సేపు సాగిన సమావేశంలో ఇద్దరి మధ్య సినిమాల గురించి మాత్రమే చర్చ జరిగిందని స్పష్టం చేశారు. సీనియర్‌ ఎన్టీఆర్ రాజకీయ ప్రస్థానం గురించి మాట్లాడుకున్నారని కిషన్ రెడ్డి తెలిపారు. తెదేపాను ప్రజల్లోకి తీసుకెళ్లిన వైనంపై ఇద్దరి మధ్య చర్చకు వచ్చిందని’ పేర్కొన్నారు.
ఆదివారం మునుగోడులో నిర్వహించిన బహిరంగ సభ ముగిసిన అనంతరం హైదరాబాద్‌ విచ్చేసిన అమిత్‌షా శంషాబాద్‌ విమానాశ్రయంలోని నోవాటెల్‌కు రాత్రి 10.26కి చేరుకున్నారు. ఆ తర్వాత ఎన్టీఆర్ అక్కడికి వచ్చారు. కేంద్ర మంత్రి జి.కిషన్‌రెడ్డి ఎన్టీఆర్‌ను అమిత్‌షా వద్దకు తీసుకెళ్లారు. ఎన్టీఆర్‌ను అమిత్‌షా పుష్పగుచ్ఛంతో ఆహ్వానించగా.. అమిత్‌షాకు ఎన్టీఆర్ శాలువా కప్పి సత్కరించారు. అనంతరం వీరిద్దరితో పాటు పార్టీ నాయకులు కిషన్‌రెడ్డి, తరుణ్‌ఛుగ్‌, బండి సంజయ్‌లు కలిసి భోజనం చేశారు.
