కర్ణాటక కాంగ్రెస్ ఫలితాలను దేశవ్యాప్తంగా రిపీట్ చేయాలనే ఊపులో ఉంది కాంగ్రెస్ పార్టీ. ఈ నేపథ్యంలో ఆయా రాష్ట్రాల్లో అధికారాన్ని కాపాడుకోవడంపైనా.. మరోవైపు ఇతర రాష్ట్రాల్లో అధికారంలోకి రావడంపైనా దృష్టి సారించింది. ఈ నేపథ్యంలోనే కొన్నేళ్లుగా రాజస్థాన్ కాంగ్రెస్లో ఉన్న వర్గపోరుకు ముగింపు పలికే దిశగా చర్యలు చేపట్టింది. ఇందులో భాగంగానే రాజస్థాన్ సీఎం అశోక్ గహ్లోత్, సీనియర్ నేత సచిన్ పైలట్తో కాంగ్రెస్ చీఫ్ మల్లికార్జున ఖర్గే, అగ్రనేత రాహుల్ గాంధీ భేటీ అయ్యారు.
“వచ్చే అసెంబ్లీ ఎన్నికల్లో ఐక్యంగా పోరాడాలని నిర్ణయించుకున్నాం. రాజస్థాన్ మరోసారి అధికారాన్ని కైవసం చేసుకుంటాం. అశోక్ గహ్లోత్, సచిన్ పైలట్ ఇద్దరూ ఈ ప్రతిపాదనను ఏకగ్రీవంగా అంగీకరించారు. మాది బీజేపీపై ఉమ్మడి పోరు. రాజస్థాన్లో మళ్లీ అధికారం మాదే” అని కాంగ్రెస్ ప్రధాన కార్యదర్శి కేసీ వేణుగోపాల్ తెలిపారు.
సోమవారం సాయంత్రం ఆరు గంటల సమయంలో కాంగ్రెస్ అధ్యక్షుడు మల్లికార్జున ఖర్గే ఇంటికి ముఖ్యమంత్రి అశోక్ గహ్లోత్ వెళ్లారు. ఆ తర్వాత రాహుల్ అక్కడకు చేరుకున్నారు. ఆ తర్వాత ఇద్దరితో గహ్లోత్ భేటీ అయినట్లు తెలిసింది. రాత్రి 8 గంటల సమయంలో సచిన్ పైలట్.. రాహుల్, ఖర్గేతో సమావేశమయ్యారు. చాలా నెలల తర్వాత హైకమాండ్ సమక్షంలో అశోక్ గహ్లోత్- సచిన్ పైలట్ ముఖాముఖి సమావేశం ఇదే కావడం గమనార్హం.
