టమాట ధరలు సామాన్యులను బెంబేలెత్తిస్తున్నాయి. మొన్నటిదాక రూ.150 వరకు ఉన్న ధరలు ఇప్పుడు ఏకంగా రూ.300 నుంచి రూ.400 దాకా ఎగబాకాయి. ముఖ్యంగా చండీగఢ్ మార్కెట్లో టమాట ధర తారా స్థాయికి చేరుకుంది. కిలో టమాటా ధర రూ. 200 నుంచి 250 వరకు పలుకుతోంది. అదే రిటైల్ దుకాణాల్లో అయితే ఏకంగా రూ. 300 నుంచి 400 లకు విక్రయిస్తున్నారు. కాస్త తక్కువ నాణ్యత గల టమాటా అదే మార్కెట్లో రూ. 100 – 150గా ఉంది. పెట్రోల్ కంటే టమాట ధరలే ఎక్కువగా ఉన్నాయని సామాన్యులు వాపోతున్నారు.
భారీ వర్షాలే ధరల పెరుగుదలకు ప్రధాన కారణమని కూరగాయల విక్రయదారులు చెబుతున్నారు. చండీగఢ్కు ప్రధానంగా పంజాబ్, హరియాణా, హిమాచల్ ప్రదేశ్ రాష్ట్రాల నుంచే కూరగాయలు వస్తుంటాయి. ముఖ్యంగా టమాటా, ఉల్లి నాశిక్ నుంచి వస్తాయి. కానీ నిరంతర వర్షాల వల్ల వాహనాల రాకపోకలకు ఇబ్బందులు ఏర్పడి.. రవాణా నిలిచిపోయింది. చండీగఢ్ మార్కెట్కు సోలన్ జిల్లా నుంచే టమాటా సరఫరా అవుతున్నాయని విక్రయదారులు పేర్కొన్నారు.
