భారతీయ జనతా పార్టీలో తెలంగాణ రాష్ట్రానికి చెందిన ఎంపీ టికెట్ల కేటాయింపు దాదాపు కొలిక్కి వచ్చినట్లు తెలుస్తోంది. కానీ, మహబూబ్నగర్, మల్కాజిగిరి ఎంపీ టికెట్ల ఖరారుపై పీఠముడి నెలకొన్నట్లు సమాచారం. సీనియర్ నేతలు ఎవరికి వారు తమకే టికెట్ కేటాయించాలని పట్టుబట్టడంతో రాష్ట్ర నాయకత్వం చేతులెత్తేసినట్లు తెలుస్తోంది. మహబూబ్నగర్, మల్కాజిగిరి అభ్యర్థిత్వాలను అధిష్ఠానమే తేల్చాలని పేర్కొంటున్నట్లు సమాచారం. తొలి విడతలో ఈ రెండు స్థానాల అభ్యర్థుల ఖరారు ఉండకపోవచ్చని విశ్వసనీయ సమాచారం.
మహబూబ్నగర్ ఎంపీ టికెట్ను బీజేపీ జాతీయ ఉపాధ్యక్షురాలు డీకే అరుణ ఆశిస్తున్నారు. తనకే టికెట్ కేటాయించాలని పట్టుబడుతున్నట్లు సమాచారం. మరోవైపు బీజేపీ సీనియర్ నేత, మాజీ ఎంపీ జితేందర్రెడ్డి కూడా ఎంపీ టికెట్ను ఆశిస్తున్నారు. ఇదే నియోజకవర్గం నుంచి ఆయన గతంలో ఎంపీగా ప్రాతినిధ్యం వహించారు. ఈ నేపథ్యంలో తనకే ఎంపీ టికెట్ కేటాయించాలని కోరుతున్నట్లు తెలుస్తోంది.
మల్కాజిగిరి ఎంపీ స్థానాన్ని ఆశిస్తున్న వారి సంఖ్య ఎక్కువే ఉంది.
సీనియర్ నేతలు ఈటల రాజేందర్, మురళీధర్ రావు, వీరేందర్ గౌడ్, పాల్వాయి హరీశ్రెడ్డితోపాటు ఢిల్లీ పభ్లిక్ స్కూల్ సంస్థల అధినేత మల్క కొమురయ్య సైతం టికెట్ను ఆశిస్తున్నారు. అయితే ప్రధాన పోటీ మాత్రం సీనియర్ నేతలు ఈటల రాజేందర్, మురళీధర్ రావు మధ్యలోనే ఉంది. ఈటలకు కేంద్ర హోంమంత్రి ఆశీస్సులు ఉన్నట్లు సమాచారం. అయితే, బీజేపీ మధ్యప్రదేశ్ రాష్ట్ర ఇన్చార్జి అయిన మురళీధర్ రావుకు తెలంగాణ సీనియర్ నేతలు సపోర్ట్ చేస్తున్నారు. ఈ నేపథ్యంలో ఎవరికి టికెట్ వస్తుందనేది సస్పెన్స్ నెలకొంది.
