రాష్ట్రంలో శాసనసభ ఎన్నికల నేపథ్యంలో అసంతృప్తులంతా పార్టీల మార్పుపై ఫోకస్ చేస్తున్నారు. టికెట్ ఆశించి భంగపడ్డ వారంతా ఇతర పార్టీల్లోకి జంప్ అవుతున్నారు. జింపింగ్లతో ప్రస్తుతం రాష్ట్ర రాజకీయాల్లో జోష్ నెలకొంది. కీలక నేతలే పార్టీలు మారుతుండటంతో వారితో పాటు వారి అనుచరగణం కూడా వెంట వెళ్తున్నారు. తాజాగా బీజేపీ నేత, మాజీ ఎంపీ గడ్డం వివేక్ కమలం పార్టీకి రాజీనామా చేశారు. కాంగ్రెస్లో చేరుతున్నట్లు తెలిపారు.
తెలంగాణ ప్రజల ఆశలను బీఆర్ఎస్ నెరవేర్చలేకపోయిందని వివేక్ అన్నారు. కేసీఆర్‌ కుటుంబం తమ కుటుంబ ఆకాంక్షల మేరకే పనిచేస్తోందని.. ప్రజా సంక్షేమం ఆ పార్టీకి పట్టడం లేదని ఆరోపించారు. కేసీఆర్‌ను గద్దె దింపాలన్న లక్ష్యంతోనే కాంగ్రెస్లో చేరానని చెప్పుకొచ్చారు. టికెట్ అనేది తనకు అంత ముఖ్యమైన విషయం కాదని స్పష్టం చేశారు. ఈ ఎన్నికల్లో హస్తం పార్టీ తనకు టికెట్ ఇవ్వకపోయినా.. బీఆర్ఎస్ పార్టీ అధికారంలోకి రాకుండా తన వంతు కృషి చేస్తానని మాజీ ఎంపీ గడ్డం వివేక్ వెల్లడించారు.
