కాంగ్రెస్ పార్టీ అగ్రనేత, ఎంపీ రాహుల్ గాంధీ పై సెటైర్లు వేశారు బీఆర్ఎస్ ఎమ్మెల్సీ కల్వకుంట్ల కవిత. బుధవారం నిజామాబాద్ జిల్లా బోధన్ ఎన్ఎస్ఎఫ్ మైదానంలో నిర్వహించిన బీఆర్ఎస్ బూత్ కమిటీ సభ్యుల సమావేశానికి ఎమ్మెల్యే షకీల్ తో కలిసి కవిత పాల్గొన్నారు. ఈ సందర్భంగా ఎన్నికల శంఖారావం ప్రారంభించారు. అనంతరం ఎమ్మెల్సీ కవిత మాట్లాడుతూ.. వెయ్యి ఎలుకల్ని తిన్న పిల్లి హజ్ యాత్ర చేసినట్లు.. రాహుల్ గాంధీ జోడొయాత్ర చేశారని విమర్శించారు.
దేశాన్ని ఇన్నేళ్లు పాలించిన ఆయన కుటుంబం ప్రజలకు ఏం చేసిందని ప్రశ్నించారు. తమ ప్రభుత్వంలో కులమతాలకు తావు లేకుండా ప్రతి ఇంటికి సంక్షేమ పథకాలు అందుతున్నాయి అన్నారు. ప్రతి కులానికి తాము ఆత్మగౌరవ భవనం నిర్మించామన్నారు. గులాబీ జెండా ఉత్సాహాన్ని బోధన్ ప్రజలు మరోసారి చూపించాలన్నారు. బీఆర్ఎస్ చేసిన అభివృద్ధిని ప్రజలకు వివరించాలని సూచించారు.
