కోలీవుడ్ స్టార్ హీరో సూర్య నటిస్తున్న తాజా మూవీ ఈటీ( ఎవరికి తలవంచడు) . తాజాగా ఈసినిమా ప్రీరిలీజ్ ఈవెంట్ గురువారం హైదరాబాద్ లో నిర్వహించారు. దగ్గుబాటి రాణా ముఖ్య అతిథిగా హాజరయ్యారు. రాణాతో పాటు దగ్గుబాటి సురేశ్, ‘దిల్’రాజు, బోయపాటి శ్రీను, గోపీచంద్ మలినేని వంటి వారు అతిథులుగా వచ్చారు. ఈ వేడుకలో పాల్గొన్న హీరో సూర్య మాట్లాడుతూ… నాకు సామాజిక సేవాకార్యక్రమాల్లో మెగాస్టార్ చిరంజీవే ప్రేరణ అన్నారు. చిరంజీవి ప్రేరణతోనే ఫౌండేషన్ మొదలు పెట్టి సామాజిక కార్యక్రమాలు చేస్తున్నట్లు చెప్పారు. కరోనా తరువాత తెలుగు ప్రేక్షకులు థియేటర్లకు వచ్చి సినీ పరిశ్రమను ఆదుకున్నారని అన్నారు.
‘ ఈటీ’ సినిమాలో సూర్యకు జోడీగా ప్రియాంక అరుళ్ మోహన్ నటిస్తోంది. ఆకాశం నీహద్దురా, జైభీమ్ వరస హిట్ల తరువాత వస్తున్న సినిమా కావడంతో ఈటీపై భారీ అంచనాలు నెలకొన్నాయి. ఈ సినిమా కోసం సూర్య తెలుగు డబ్బింగ్ చెప్పారు. పాండి రాజ్ ఈ మూవీకి దర్శకత్వం వహించగా… ఇమాన్ మ్యూజిక్ అందించారు. మార్చి 10న ఈ సినిమా థియేటర్లలోకి రానుంది.
