మాజీ కాంగ్రెస్ నేత, పాటీదార్ ఉద్యమ నాయకులు హార్దిక్ పటేల్ ఈ రోజు బీజేపీలో చేరనున్నారు. కాంగ్రెస్ వర్కింగ్ ప్రెసిడెంట్ గా ఉన్న ఈయన ఇటీవల ఆ పార్టీకి గుడ్ బై చెప్పారు. జూన్ 2న బీజేపీలో చేరుతున్నట్లు ప్రకటించారు. తాజాగా ఈరోజు బీజేపీ చేరుతున్న తరుణంలో ఆయన ట్వీట్ చేశారు. ‘‘ ఈ రోజు నుంచి నూతన అధ్యాయం ప్రారంభించబోతున్నాను. దేశం కోసం ప్రధాని నరేంద్ర మోదీ నాయకత్వలో పనిచేయబోతున్నాను’’ అంటూ ట్వీట్ చేశారు.
గుజరాత్ ఎన్నికల ముందు హర్దిక్ పటేల్ రూపంలో కాంగ్రెస్ పార్టీకి భారీ షాక్ తగిలింది. కాంగ్రెస్ పార్టీకి రాజీనామా చేసిన తర్వాత ఆ పార్టీపై విరుచుకుపడుతున్నారు హార్దిక్ పటేల్. రాముడిపై చేసిన వ్యాఖ్యలను తిప్పికొట్టారు. శ్రీరాముడితో కాంగ్రెస్ పార్టీకి ఏం సమస్య అంటూ ప్రశ్నించారు. హిందువుల మనోభావాలకు కాంగ్రెస్ ఎప్పుడూ విలువ ఇవ్వలేదని విమర్శించారు. ఈ ఏడాది చివర్లో జరిగే గుజరాత్ ఎన్నికల్లో బీజేపీ పార్టీకి హార్దిక్ పటేల్ చేరిక మరింత కలిసి వస్తుంది.
