టాలీవుడ్ యువ నటుడు శర్వానంద్ జూన్ 3న రాత్రి 11 గంటలకు పెళ్లి చేసుకున్న సంగతి తెలిసిందే. వీరి పెళ్లి రాజస్థాన్‌లోని జైపూర్‌లో ఉన్న లీలా ప్యాలెస్‌ వేదికగా రెండు రోజులపాటు గ్రాండ్‌‌గా జరిగింది. ఈ వేడుకకు కేవలం కుటుంబ సభ్యులు, అత్యంత సన్నిహితులు మాత్రమే హాజరయ్యారు. అందుకు సంబంధించిన ఫోటోలు, వీడియోలు నెట్టింట వైరల్ అవుతున్నాయి. ఇక పెళ్లి వేడుక అనంతరం జూన్ 9 న హైదరాబాద్ లో గ్రాండ్ గా రిసెప్షన్ జరగనుంది. ఈ రిసెప్షన్ కు తెలంగాణ ముఖ్యమంత్రి కేసీఆర్ ను ఆహ్వానించారు శర్వానంద్. ఈ మేరకు శర్వానంద్ స్వయంగా ముఖ్యమంత్రి కార్యాలయానికి వెళ్లి ఆహ్వానపత్రికను అందజేశారు. అనంతరం కాసేపు ముఖ్యమంత్రితో ముచ్చటించారు.
శర్వానంద్ రిసెప్షన్ కి అతిరథమహారధులు హాజరు కాబోతున్నట్లు తెలుస్తోంది. ఇంతకాలం బ్యాచిలర్ లైఫ్ ఎంజాయ్ చేసిన శర్వానంద్ 38 ఏళ్ల వయసులో ఎట్టకేలకు ఓ ఇంటివాడయ్యాడు. శర్వాని ఫాలో అవుతూ మెగా ప్రిన్స్ వరుణ్ తేజ్ కూడా వివాహానికి రెడీ అవుతున్న సంగతి తెలిసిందే. తన ప్రియురాలు నటి లావణ్య త్రిపాఠితో వరుణ్ తేజ్ ఎంగేజ్మెంట్ జూన్ 9నే జరగనున్నట్లు అధికారిక ప్రకటన వచ్చింది.
