ప్రధాని మోడీ పర్యటనలో భద్రతా వైఫల్యం మరోసారి బయటపడింది. కర్ణాటక అసెంబ్లీ ఎన్నికల్లో భాగంగా శనివారం ప్రధాని మోడీ కర్ణాటకలోని దేవనాగరి జిల్లాలో నిర్వహించిన రోడ్డు షోలో పాల్గొన్నారు. అయితే ఓ యువకుడు బారీకేడ్లను దాటుకుంటూ మోడీ కాన్వాయ్ మీదకు దూసుకొచ్చాడు. వెంటనే అప్రమత్తమైన పీఎం సెక్యూరిటీ సిబ్బంది ఆ యువకుడిని అడ్డుకుని లాగిపారేశారు. అనంతరం పోలీసులకు అప్పగించారు. కొప్పాల్ జిల్లాకు చెందిన వ్యక్తిగా ఆ యువకుడిని పోలీసులు గుర్తించారు. కాగా ప్రధాని మోడీ పర్యటనలో భద్రతా వైఫల్యం కనబడటం ఇది రెండోసారి. గతేడాది హుబ్బలి జిల్లాలో పీఎం మోడీ పర్యటించినప్పుడు కూడా భద్రతాలోపం కొట్టొచ్చినట్లు కనిపించింది.
అయితే.. ప్రధాని నరేంద్ర మోదీ నేడు తన పర్యటన సందర్భంగా చిక్కబళ్లాపూర్, బెంగుళూరు మరియు దావణగెరెలలో ఏర్పాటు చేసిన వివిధ కార్యక్రమాలలో ప్రధాని పాల్గొన్నారు. అంతేకాదు బెంగుళూరు మెట్రో ఫేజ్ 2 యొక్క కొత్త సెక్షన్‌ను కూడా మోదీప్రారంభించారు. ఈ మెట్రోకొత్త లైన్‌ బెంగళూరు యొక్క మొదటి టెక్ కారిడార్ మెట్రో నెట్‌వర్క్‌కు అనుసంధానించబడింది.వైట్‌ఫీల్డ్ (కడుగోడి) స్టేషన్‌లో మెట్రో స్ట్రెచ్‌ను ప్రధాని ప్రారంభించారు. పాఠశాల విద్యార్థులు, మెట్రో కార్మికులతో కలిసి మోదీ కూడా మెట్రోలో ప్రయాణించారు.6 కోచ్‌లను కలిగి ఉన్న 5 రైళ్లతో ఈ మార్గం నడపబడుతుంది. మరో రెండు రైళ్లను బ్యాకప్‌గా ఉంచనున్నట్లు బెంగళూరు మెట్రో రైల్ కార్పొరేషన్ లిమిటెడ్ (బీఎంఆర్‌సీఎల్) తెలిపింది. రైలు ఫ్రీక్వెన్సీ 12 నిమిషాలు ఉంటుంది . ఈ మార్గంలో గరిష్ట ఛార్జీ రూ. 35 ఉంటుంది.
