కర్ణాటకలో ఐటీ రంగంలో పనిచేసే ఉద్యోగుల పనివేళలు 14 గంటలు చేయాలనే ప్రతిపాదన చర్చనీయాంశమైన విషయం తెలిసిందే. అయితే ఉద్యోగుల వర్కింగ్ టైమ్ను పెంచాలని ఐటీ సంస్థలే ప్రభుత్వంపై ఒత్తిడి తెస్తున్నాయని ఆ రాష్ట్ర కార్మికశాఖ మంత్రి సంతోశ్‌ లాడ్‌ తెలిపారు. ఉద్యోగుల పని గంటలు పెంచాలని సిద్ధరామయ్య ప్రభుత్వం తీర్మానించడంతో ఉద్యోగుల్లో ఆందోళన మొదలైన విషయం తెలిసిందే.
ఈ సందర్భంగా దీనిపై స్పందించిన కార్మిక శాఖ మంత్రి … ఉద్యోగుల పని వేళలను పెంచాలని నిర్ణయించింది ఐటీ మంత్రి కాదని స్వయంగా పరిశ్రమలేనని చెప్పారు. వారి ఒత్తిడి మేరకే ఈ బిల్లు తీర్మానం వరకు వచ్చిందని, దీనిపై చర్చలు జరుగుతున్నట్లు వెల్లడించారు. ఈ వ్యవహారంపై ఉద్యోగుల్లో భిన్నాభిప్రాయాలు వ్యక్తమవుతున్నాయని … దీనిపై పారిశ్రామికవేత్తలు బహిరంగ చర్చ జరపాల్సిన అవసరముందని అభిప్రాయపడ్డారు. ప్రజలు కూడా దీనిపై తమ అభిప్రాయాలను పంచుకోవాలని కోరిన సంతోశ్‌ అప్పుడే ఈ సమస్యకు సరైన పరిష్కారం దొరుకుతుందని అన్నారు. ఐటీ, ఐటీఈఎస్, బీపీఓ రంగాల్లోని ఉద్యోగులు రోజులో 12 గంటలకు మించి పని చేసేందుకు కొత్త బిల్లు అనుమతిస్తుంది. రోజులో గరిష్ఠంగా 14 గంటల చొప్పున పని చేయడానికి వీలు కల్పించేలా ప్రతిపాదిస్తుంది.
