తాను పేదల సంక్షేమం కోసం, దేశ అభివృద్ధి కోసం ప్రయాసపడుతుంటే, కాంగ్రెస్, ఇతర ప్రతిపక్ష పార్టీలు మాత్రం తన సమాధి కట్టడంలో నిమగ్నమయ్యారు అని అన్నారు ప్రధాని నరేంద్ర మోదీ. తనకు రక్షణ కవచాలు ప్రజల ఆశీర్వాదాలే అన్నారు మోదీ. మైసూరు-బెంగళూరు మధ్య నిర్మించిన ఎక్స్ప్రెస్ వేను కర్ణాటకలోని మండ్యలో ప్రధాన మంత్రి ఆదివారం ప్రారంభించి, దేశానికి అంకితం చేశారు. అనంతరం జరిగిన సభలో ప్రసంగించిన మోదీ ఈ మేరకు వ్యాఖ్యలు చేపట్టారు.”దేశ అభివృద్ధి కోసం, ప్రజల జీవనం మెరుగుపడడం కోసం, మైసూరు-బెంగళూరు రహదారి కట్టడానికి డబుల్ ఇంజిన్ ప్రభుత్వం శతవిధాలా శ్రమిస్తోంది.
కాంగ్రెస్ ఇతర ప్రతిపక్ష పార్టీలు మాత్రం మోదీకి సమాధి కట్టాలని కలలు కంటున్నాయి. నా సమాధి కట్టాలనుకునే కాంగ్రెస్ నేతలకు తెలియదు, నాకు కోట్ల మంది ప్రజల ఆశీర్వాదముందని.నాకు రక్షణ కవచం ఆ ఆశీర్వాదమే. పేదలను ఇబ్బందులకు గురి చేసే వారిని నేను అస్సలు వదిలిపెట్టను.పేదల అభివృద్ధికి కావాల్సిన రూ.కోట్ల డబ్బును కాంగ్రెస్ లూటీ చేసింది. మిమ్మల్ని కాపాడటానికి 2014 లో మీరు నాకు అవకాశమిచ్చారు. దానివల్లే మా ప్రభుత్వం ఏర్పడడం జరిగింది. ఈ ప్రభుత్వం పేదల బాధల్ని, ఇబ్బందులను అర్థం చేసుకుంటుంది. వాటి నుంచి విముక్తి పొందేందుకు అన్ని రకాల చర్యలు తీసుకుంటుందని తెలిపారు ప్రధాని నరేంద్ర మోదీ.
