కట్నం డబ్బుల కోసం కట్టుకున్నదని శీలాన్ని అంగట్లో పెట్టాడో ఓ బుద్ధిమాలిన భర్త. అమ్మగారి ఇంటి నుంచి కట్నం తీసుకురాలేదనే కోపంతో ఏడడుగులు వేసిన భార్యపై బంధువులతో అత్యాచారం చేయించి, దాన్ని వీడియో తీసి యూట్యూబ్‌లో పెట్టాడో భర్త.. ఈ ఘటన రాజస్థాన్ రాష్ట్రంలో తాజాగా భరత్‌పూర్‌లో వెలుగుచూసింది. 2019లో భరత్‌పూర్‌ ప్రాంతానికి చెందిన వ్యక్తి హర్యానాకు చెందిన మహిళను పెళ్లి చేసుకున్నాడు. వివాహం సందర్భంగా అత్తింటివారు అల్లుడికి రూ.1.5లక్షల కట్నం ఇవ్వలేక పోవడంతో అత్తింటివారు కట్నం కోసం కోడలిని వేధిస్తుండేవారు. దీంతో భార్య పుట్టింటికి వెళ్లిపోయింది. అయితే ఈ నేపథ్యంలో భార్యకు మాయమాటలు చెప్పి భర్త తన ఇంటికి తిరిగి తీసుకువచ్చి.. ఆమెపై తన ఇద్దరు సమీప బంధువులతో అత్యాచారం చేయించాడు ఈ రాక్షసుడు.
అత్యాచారం ఘటనను భర్తే తన ఫోన్ లో రికార్డు చేసి.. ‘‘మీ కుటుంబ సభ్యులు నాకు కట్నం ఇవ్వలేకపోయారు, కానీ ఇప్పుడు ఈ అశ్లీల వీడియోను యూట్యూబ్‌లో పెట్టడం ద్వారా నేను కట్నం డబ్బులు సంపాదిస్తాను’’ అని పేర్కొంటూ అశ్లీల వీడియోను తన భర్త యూట్యూబ్‌లో అప్‌లోడ్ చేశాడు. అయితే సదరు మహిళ నిందితుల వద్ద నుంచి తప్పించుకొని పుట్టింటికి పారిపోయి.. కీచక బాగోతం, అశ్లీల వీడియో చిత్రీకరణపై పోలీసులకు ఫిర్యాదు చేసింది. బాధితురాలి ఫిర్యాదు మేర తాము కేసు నమోదు చేసి దర్యాప్తు చేస్తున్నామని భరత్‌పూర్‌లోని కమాన్ పోలీస్ స్టేషన్ స్టేషన్ హౌస్ ఆఫీసర్ దౌలత్ సాహు వెల్లడించారు.
