తిరుపతిలో వ్యక్తిని కాలితో తన్నిన పోలీస్… వీడియో వైరల్ కావడంతో సస్పెండ్

తిరుపతిలో అన్నమయ్య సర్కిల్ లో శనివారం ఓ వ్యక్తిని పోలీస్ కాలితో తన్నాడు. సదరు వ్యక్తి పడుతున్నా వదలకుండా కాలితో తన్నిన వీడియో వైరల్ అయింది. దీంతో ఈ ఘటనపై ఉన్నతాధికారులు చర్యలు తీసుకున్నారు. తను ఉద్దేశపూర్వకంగా తన్నలేదని సదరు హెడ్ కానిస్టేబుల్ చెప్పే ప్రయత్నం చేశారు. అయితే వీడియో తెగ వైరల్ కావడం నెటిజెన్ల నుంచి వ్యతిరేఖత రావడంతో కానిస్టేబుల్ ను సస్పెండ్ చేశారు అధికారులు.

అయితే ఈ ఘటనలపై తిరుపతి డీఎస్పీ కాటం రాజు మాట్లాడుతూ… మద్యం మత్తులో ఉన్న వ్యక్తికి, ఏపీఎస్ ఆర్టీసీ డ్రైవర్ తో గొడవ జరిగిందని, మద్యం మత్తులో ఉన్న వ్యక్తిని బస్సులో ఎక్కించుకోవడానికి అనుమతించకపోవడంతోనే గొడవ జరిగినట్లు ఆయన వెల్లడించారు. ఇదే సమయంలో ఈ గొడవ గురించి తెలుసుకున్న ట్రాఫిక్ కానిస్టేబుల్ విషయాన్ని పరిష్కరించేందుకు ప్రయత్నించాడని.. అయితే మద్యం మత్తులో ఉన్న వ్యక్తి అసభ్య పదజాలంతో దూషించడంతో కానిస్టేబుల్ ఇలా చేశాడని వెల్లడించారు.