గ్రామ, వార్డు సచివాలయ ఉద్యోగులకు శుభవార్త. సచివాలయాల ఉద్యోగుల ప్రొబేషన్ ఖరారు చేయడంతో పాటు వారికి 2022 జనవరిలో ప్రకటించిన పే రివిజన్‌(11 పీఆర్సీ) ప్రకారం పే స్కేళ్లను నిర్ధారిస్తూ ప్రభుత్వం శనివారం ఉత్తర్వులు జారీ చేసింది. దాదాపు లక్ష మంది ఉద్యోగులు ప్రొబేషన్ ఖరారుకు అర్హత పొందుతారని అధికారులు తెలిపారు. తద్వారా వారి జీతాలు దాదాపు రెట్టింపు కానున్నాయి. కనీసం రెండేళ్ల సర్వీస్‌ను పూర్తి చేసి, నిర్దేశించిన డిపార్ట్‌మెంటల్ పరీక్షల్లో ఉత్తీర్ణులై, స్పష్టమైన పూర్వాపరాలను కలిగి ఉన్న కార్యకర్తలకు ఇది వర్తించనుంది.
అయితే ఇప్పటివరకు ప్రొబేషన్ ప్రకటించిన గ్రామం/వార్డు కార్యకర్తలకు రాష్ట్ర ప్రభుత్వం ఫిక్స్‌డ్ పే స్కేల్‌లను వర్తింపజేసింది. AP స్టేట్ సబార్డినేట్ సర్వీస్ రూల్స్ 1996లోని రూల్ 18 (ఏ )ని సడలించడంలో ప్రొబేషన్‌ను ప్రకటిస్తూ రాష్ట్ర ప్రభుత్వం ఈ మేరకు జీవోను జారీ చేసింది. ఈ ఉత్తర్వు ప్రకారం మే 1 నుంచి గ్రామం/వార్డు కార్యకర్తలకు కొత్త పే స్కేల్‌లు వర్తిస్తాయి. ప్రభుత్వం ప్రొబేషన్ ఖరారు ఉత్తర్వులు విడుదల చేసిన చేసిన నేపథ్యంలో రానున్న మూడు, నాలుగు రోజుల్లో 26 జిల్లాల్లో వేర్వేరుగా ఆయా జిల్లా కలెక్టర్ల ఆధ్వర్యంలో అర్హులైన ఉద్యోగుల జాబితాలతో కూడిన ప్రొసీడింగ్స్‌ జారీ చేస్తారు.
