సిగ్గు సిగ్గు: తెలంగాణ క్రైం రిపోర్ట్… ఏమి మారాలి?

పురుషుడి విజయం వెనుక స్త్రీ ఉంటుందో లేదో తెలియదు కానీ… నాశనం అయిపోతున్న స్త్రీ బ్రతుకు వెనుక మాత్రం పురుషుడు ఉంటున్నాడు!… పేరు ఏదైనా, వయసు ఎంతైనా .. మృగాడి చేతిలో బలైపోతున్న మహిళల సంఖ్య రోజు రోజుకీ పెరిగిపోతుంది. మత్తు చాటునో, మదమెక్కిన మస్తిష్కం వల్లనో మృగాడి వికృతచేష్టల మాటున స్త్రీ బలైపోతుంది.

crime-in-telangana

నేషనల్ క్రైం బ్యూరో నివేధికలో తెలంగాణలో రోజు రోజుకీ పెరిగిపోతున్న క్రైం వివరాలు… ప్రశ్నిస్తున్నాయి.. వెక్కరిస్తున్నాయి.. ఆలోచింప‌జేస్తున్నాయి… పెరుగుతున్న మృగాళ్ల వివరాలు చెబుతున్నాయి! అవును.. తెలంగాణలో 2020లో నేరాల పెరుగుదల 12శాతం గా ఉంది. విశ్వనగరంలో క్రైం విపరీతంగా పెరిగిపోతుంది. స్త్రీ క్షేమాన్ని ప్రశ్నిస్తుంది…

2020 నేషనల్ క్రైం బ్యూరో నివేదిక ప్రకారం… మహిళలపై జరిగిన లైంగిక వేదింపుల కేసులు 4907 గా ఉండగా… చిన్నారులపై లైంగిక దాడులు, ఫోక్సో కేసుల సంఖ్య 2074గా ఉంది. ఇక మహిళలపై దాడుల సంఖ్య 2520 గా ఉండగా… విశ్వనగరం భాగ్యనగరంలో రేప్ కేసులు 92 గా నమోదయ్యాయి. ఇవి మచ్చుకు కొన్ని మాత్రమే… వెలుగులోకి వచ్చినవి మాత్రమే! ఇంకా వెలుగులోకి రానివి, బయటప్రపంచానికి కనిపించనివి ఎన్నో మరెన్నో…!

మృగాళ్ల మ‌స్థిస్కాల్లో ఇంత‌టి పాశ‌విక ఆలోచ‌న‌ల‌కు కార‌ణాలేంటి..? ఒక్క‌టి కాదు వంద కార‌ణాలున్నాయి. గంజాయి ద‌గ్గ‌రినుండి అశ్లీల చిత్రాల వ‌ర‌కు నేటి స‌మాజంలో జ‌రిగే అకృత్యాల‌కు ప్ర‌త్య‌క్షంగా, ప‌రోక్షంగా కార‌ణ‌మ‌వుతున్నాయి. అశ్లీల వెబ్ సైట్స్ బ్యాన్ చేసినా ఫ‌లితం లేదు. విచ్చ‌ల విడిగా వ‌చ్చేస్తున్నాయి. స‌రైన నిఘా లేక‌పోవ‌డంతో కొత్త కొత్త పేర్ల‌తో యువ‌త మొబైల్స్‌లోకి చొచ్చుకుపోతున్నాయ్‌. గంజాయి వాడ‌కం ఎక్కువైంది చిన్న చిన్న గ్రామాల్లో కూడా దొరికేంత‌గా అందుబాలోకొచ్చింది. పిల్ల‌ల‌ను పెంప‌కంలో కూడా జాగ్ర‌త్త లేక‌పోవ‌డం, స‌మాజం అంటే బాద్య‌త లేక‌పోవ‌డం, ఎవ‌రేం చేస్తారు అనే టెంప‌రిత‌నం..

అమ్మాయిల అలంక‌ర‌ణ‌, ధ‌రించే వ‌స్త్రాల వ‌ల్లే అఘాయిత్యాలు జ‌రుగుతున్నాయ‌నే స‌న్నాసి మేధావుల్లారా..? సైదాబాద్ సింగ‌రేణి కాల‌నీలో ఆరేళ్ల వ‌యసున్న పాప‌పై జ‌రిగిన అఘాయిత్యానికి కార‌ణం?? ఏం త‌ప్పుచేసిందా పాప, ఏ విధంగా రెచ్చ‌గొట్టింది.?? ఆలోచించండి..

మారాలి… పాలకులు మారాలి, పోలీసు వ్యవస్థ మారాలి, చట్టాలు మారాలి – ఆ చట్టాలలోని శిక్షలు మారాలి, పిల్లలను పెంచే విధానం మారాలి, మహిళలపై గౌరవాలు పెరగాలి, అంతకంటే ముందు మనిషి మారాలి.. మగాడు అనేవాడు మారాలి, మహిళలు మరింత జాగ్రత్తగా ఉండాలి!