ఏపీలోని చిత్తూరులో ఘోర రోడ్డు ప్రమాదం సంభవించింది. ఓ విద్యార్థి తలపై నుంచి ట్రాక్టర్ వెళ్లడంతో అతను అక్కడికక్కడే మృతి చెందాడు. ఈ ఘటన చిత్తూరు జిల్లాలోని మెసానిక్ గ్రౌండ్ వద్ద శనివారం ఉదయం వెలుగులోకి వచ్చింది. స్థానికుల కథనం ప్రకారం.. గిరింపేట గాండ్ల వీధికి చెందిన రెండవ తరగతీ విద్యార్థి జై నిరూప్ (7) తన తల్లితో కలిసి స్కూటీ మీద పాఠశాలకు వెళ్తున్నాడు.
ఈ క్రమంలోనే ద్విచక్రవాహనం ఒక్కసారిగా అదుపుతప్పడంతో తల్లి కొడుకు బైకు మీద నుంచి కింద పడిపోయారు. అదే సమయంలో అటుగా వెళ్తున్న ట్రాక్టర్ విద్యార్థి తలపై నుంచి ఎక్కింది. ట్రాక్టర్ వేగంగా ఉండటం, రెప్పపాటులో ఈ దారుణం జరిగిపోయింది. దీంతో ఆ విద్యార్థి అక్కడికక్కడే మరణించాడు. దీంతో బాధిత తల్లి రోదనలు మిన్నంటాయి. స్థానికుల ఫిర్యాదుతో పోలీసులు ఘటనా స్థలికి చేరుకుని విచారణ చేపట్టారు.
