ఇటీవల కాలంలో సెలబ్రిటీల ఆకస్మిక అనుమానాస్పద మరణాలు ఎక్కువవుతున్నాయి. ఇందులో కొన్ని ఆత్మహత్యలుగా తేలుతుంటే.. మరికొన్ని మాత్రం హత్యలుగా తేలి అందర్ని భయాందోళనకు గురిచేస్తున్నాయి. ఇటీవలే బిగ్బాస్ ఫేం, టిక్టాక్ స్టార్ సోనాలి ఫొగాట్ అనుమానాస్పద మరణం హత్యగా పోలీసులు నిర్ధరించారు. ఇంతలోనే మరో సింగర్ అనుమానాస్పద మరణం గుజరాత్లో కలకలం రేపింది.
గుజరాత్లోని వల్సాద్ జిల్లాలో ప్రముఖ గాయని వైశాలి బల్సారా మృతదేహం అనుమానాస్పద రీతిలో ఓ కారులో లభ్యమైంది. పార్ నదీ ఒడ్డున ఓ కారు చాలాసేపు ఆగి ఉంది. అది గమనించిన స్థానికులు.. కారు డ్రైవర్ చుట్టుపక్క ప్రాంతంలో ఉన్నాడేమోనని వెతికారు. ఎక్కడా ఎవరూ కనిపించలేదు. దీంతో అనుమానం వచ్చిన ప్రజలు.. పోలీసులకు సమాచారం అందించారు. వెంటనే ఘటనాస్థలికి చేరుకున్న పోలీసులు కారు డోర్ ఓపెన్ చూడగా బ్యాక్ సీట్లో ఓ మృతదేహం కనిపించింది. వల్సాద్కు చెందిన ప్రముఖ గాయని వైశాలి బల్సారా మృతదేహంగా పోలీసులు గుర్తించారు. శవపరీక్షల నిమిత్తం ఆసుపత్రికి తరలించారు.
వైశాలి భర్త హితేశ్ కూడా గాయకుడే. ఇద్దరూ కలిసి పలు స్టేజ్ షోల్లో పాల్గొన్నారు. శనివారం అర్ధరాత్రి 2 గంటలకు తన భార్య కనిపించడం లేదని హితేశ్ పోలీసులకు ఫిర్యాదు చేశాడు. ఆ తర్వాత ఆదివారం ఉదయం వైశాలి మృతదేహం లభ్యమైంది. అయితే ఇది హత్యనా లేక ఆత్మహత్యనా అనే కోణాల్లో పోలీసులు దర్యాప్తు చేపడుతున్నారు.
