సూపర్ స్టార్ రజినీకాంత్ ప్రస్తుతం ఇంట్లోనే రెస్ట్ తీసుకుంటున్నారు. ఇటీవల అనారోగ్యానికి గురైన ఆయన.. ఆస్పత్రిలో చికిత్స చేయించుకుని ఇంటికి పరిమితమయ్యారు. ఈ మేరకు ఎవరైనా దర్శకులు ఇంటికి వచ్చి సినిమా కథ చెప్తే వినడం.. నెక్ట్స్ మూవీకి ప్లాన్ చేసుకోవడం జరుగుతోంది. అయితే తాజాగా రజినీకాంత్‌ను తమిళ హీరో కార్తీ, ప్రముఖ నటుడు నాజర్ వెళ్లి కలిశారు. ఈ భేటీ ప్రస్తుతం తమిళ సినీ ఇండస్ట్రీలోనే చర్చనీయాంశంగా మారింది.
హీరో కార్తీ, నాజర్ నడిగర్ సంఘం తరఫున రజినీకాంత్‌ను కలిసినట్లు సమాచారం. దాదాపు రెండేళ్ల తర్వాత నడిగర్ సంఘం ఎన్నికల ఫలితాలు విడుదలయ్యాయి. ఈ ఫలితాల్లో నాజర్ అధ్యక్షుడిగా, కార్తీ కోశాధికారిగా ఎన్నికయ్యారు. ఈ క్రమంలో ఎప్పటి నుంచో పెండింగ్‌లో ఉన్న నడిగర్ సంఘ నూతన భవన నిర్మాణ పనులపై రజినీకాంత్‌తో చర్చించినట్లు సమాచారం. నూతన భవన నిర్మాణంపై రజినీకాంత్ సూచనలు, సలహాలను తీసుకున్నారు. త్వరలోనే భవన నిర్మాణ పనులు ప్రారంభం కానున్నట్లు సమాచారం.
