హైదరాబాద్ అంబర్‌పేట్‌లో నాలుగేళ్ల బాలుడు ప్రదీప్‌పై వీధి కుక్కల దాడి చేయడంతో మరణించిన ఘటన రాష్ట్ర వ్యాప్తంగా సంచలనంగా మారింది. అయితే.. ఈ ఘటనపై కాంగ్రెస్ నేతలు బుధవారం మానవ హక్కుల కమీషన్(హెచ్ఆర్సీ)కి ఫిర్యాదు చేసింది. నిర్లక్ష్యంగా వ్యవహరించిన సీఎం కేసీఆర్, మున్సిపల్ శాఖ మంత్రి కేటీఆర్, జీహెచ్ఎంసీ మేయర్ గద్వాల విజయలక్ష్మిపై కేసు పెట్టాలని హెచ్‌ఆర్సీని కోరారు. ఈ సందర్భంగా షేమ్ కేటీఆర్, షేమ్ మేయర్ అంటూ కాంగ్రెస్ నేతలు ప్లకార్డులు ప్రదర్శించారు. ఈ నేపథ్యంలో కాంగ్రెస్ వర్కింగ్ ప్రెసిడెంట్ మహేష్ గౌడ్ మీడియాతో మాట్లాడారు.
వీధి కుక్కలు స్వైరవిహారం చేస్తున్నా రాష్ట్ర ప్రభుత్వం నిర్లక్ష్యంగా వ్యవహరిస్తోందని మండిపడ్డారు. ఈ దారుణ ఘటనపై ప్రభుత్వం ఇప్పటి వరకు స్పందించలేదని మహేష్ గౌడ్ అన్నారు. మేయర్ ఏం చేస్తుందో ఎవరికి తెలియదన్నారు. ఫార్ములా ఈ కార్ రేస్ మీద ఉన్న దృష్టి.. మున్సిపల్ శాఖలో ఏం జరుగుతుందో తెలుసుకునే తీరిక కూడా కేటీఆర్‌కు లేదా? అని ప్రశ్నించారు. హెచ్‌ఆర్‌సీకి జడ్జి లేక రెండు నెలలు అవుతున్నా.. ప్రభుత్వం ఇంకా జడ్జిని నియమించడం లేదని విమర్శించారు.
