భారత్ అధ్యక్షతన జీ20 శిఖరాగ్ర సదస్సు ఆదివారం ముగిసింది. అత్యంత ప్రతిష్ఠాత్మకంగా జరిగిన ఈ సదస్సును భారత్ విజయవంతంగా.. ఎంతో అద్భుతంగా నిర్వహించిందని ప్రపంచ నేతలు ప్రశంసించారు. జీ-20 సదస్సు ముగియగా.. తదుపరి సారథ్య బాధ్యతలను ప్రధాని మోదీ బ్రెజిల్కు అప్పగించారు. డిసెంబరు 1వ తేదీన బ్రెజిల్ లాంఛనంగా చేపట్టనుండడంతో దానికి చిహ్నంగా.. చెక్కతో రూపొందించిన అధికార దండాన్ని (చిన్న సుత్తి ఆకారంలోని గవెల్‌ను) ఆ దేశాధ్యక్షుడు లూయీ ఇనాసియో లులా డసిల్వాకు ప్రధాని నరేంద్ర మోదీ అప్పగించారు.
దిల్లీ సదస్సులో తీసుకున్న నిర్ణయాల అమలుపై సమీక్షకు నవంబరు నెలాఖరులో వర్చువల్‌ విధానంలో భేటీ అవుదామని ప్రధాని మోదీ ప్రతిపాదించారు. బ్రెజిల్కు పూర్తిస్థాయిలో సహకరిస్తామని, ఆ దేశం అందించే సారథ్యం ద్వారా కూటమి తన లక్ష్యాల సాధనలో మున్ముందుకు దూసుకువెళ్లాలని ఆకాంక్షించారు. ‘
ప్రపంచం అంతా శాంతియుతంగా ఉండాలని ప్రార్థిస్తూ, ఆకాంక్షిస్తూ సంస్కృత శ్లోకాన్ని పఠించారు ప్రధాని నరేంద్ర మోదీ. గతసారి కూటమికి నేతృత్వం వహించిన ఇండోనేసియా తరఫున ఆ దేశ అధ్యక్షుడు విడోడో, తదుపరి బాధ్యతలు నిర్వహించనున్న బ్రెజిల్ తరఫున అధ్యక్షుడు లులా ఆయా బాధ్యతలకు గుర్తుగా తమతమ దేశాలకు చెందిన ఒక్కో మొక్కను మోదీకి అందజేశారు. పర్యావరణ ప్రాధాన్యాన్ని చాటేలా వాటిని భారత్ మండపం ప్రాంగణంలోనే నాటారు.
