కరోనా మహమ్మారి ఏ ముహుర్తాన వచ్చిందో కానీ..అప్పటి నుంచి ఒక దాని తర్వాత. ఒకటి ఎంట్రీ ఇస్తూనే ఉన్నాయి. పిల్లలు, పెద్దలు అని తేడా లేదు. ఆఖరికి మూగజీవులను కూడా వైరస్లు వదలడం లేదు. తాజాగా మరో కొత్త రకం వైరస్ను అమెరికా శాస్త్రవేత్తలు తాజాగా గుర్తించారు. ఖోస్తా 2గా పిలుస్తున్న ఈ వైరస్.. మనుషుల్లో వ్యాపించే అవకాశం ఉందని వైద్యులు హెచ్చరించారు. ఇది మనిషి కణాల్లోకి ప్రవేశించడంతో పాటు ప్రస్తుతం ఉన్న వ్యాక్సిన్లు దీనిపై ప్రభావం చూపించడం లేదని స్పష్టం చేశారు.
అమెరికా శాస్త్రవేత్తలు గుర్తించిన ఖోస్తా 2 వైరస్ను 2020లో తొలిసారిగా రష్యాలోని గబ్బిలాల్లోనే గుర్తించారట.. 2020లోనే ఈ ఖోస్తా 2పై పరిశోధనలు చేపట్టిన శాస్త్రవేత్తలు.. ఇది మనుషులపై ప్రభావం చూపించదు అని భావించారు. తాజాగా మరోమారు జరిగిన పరిశోధనల్లో మాత్రం.. ఈ వైరస్ మనుషులకు సోకుతుందని కనుగొన్నారు. కొవిడ్కి టీకా వేసుకున్న వారిపైనా ఇది ప్రభావం చూపిస్తుండటం కాస్త ఆందోళనకర విషయమే. ఇందుకు సంబంధించిన రీసెర్చ్.. జర్నల్ పీఎల్ఓఎస్ పాథోజెన్స్లో పబ్లిష్ అయ్యింది.
ఖోస్తా 2 వైరస్ అంటే..
ఈ సార్స్ కోవ్2, ఖోస్తా 2 వైరస్లు.. సర్బెకొవైరస్ జాతికి చెందినవి. ఖోస్తా 1.. మనుషులపై ప్రభావం చూపించదు. కానీ ఖోస్తా 2.. మనుషులకు ముప్పుగా మారే అవకాశం ఉంది. మనిషి కణాల్లోకి కొవిడ్ ఏ విధంగా ప్రవేశించిందో.. అదే విధంగా… ఈ ఖోస్తా 2 వైరస్ కూడా వెళుతుందని శాస్త్రవేత్తలు అంటున్నారు. ఒమిక్రాన్లాగా.. తీవ్రమైన అనారోగ్య సమస్యలను సృష్టించే జీన్స్ ఈ ఖోస్తా 2కు ప్రస్తుతం లేదని శాస్త్రవేత్తలు వెల్లడించారు. అయితే.. సార్స్ కొవ్ 2 జీన్స్తో ఇది కలిస్తే.. ప్రమాదం ఉండొచ్చని అభిప్రాయపడుతున్నారు.
ఖోస్తా 2 వ్యాప్తి ఎలా ఉంటుంది?
ఈ ఖోస్తా 2 ప్రస్తుతం జంతువుల్లోనే వ్యాపిస్తోంది. ఇది మరో మహమ్మారిగా మారుతుందా? లేదా? అన్నది ఇప్పుడే చెప్పలేమని శాస్త్రవేత్తలు అంటున్నారు. ఇప్పుడున్న టీకాలు.. కేవలం ఒక్క వైరస్ కోసమే రూపొందించారు. అందువల్ల వేరే వైరస్లపై ఇవి పనిచేయం లేదు. అన్ని రకాల వైరస్ల నుంచి రక్షణ పొందే విధంగా టీకాలను అభివృద్ధి చేయడం ఇప్పుడు చాలా అవసరం ఎంతైనా ఉంది.
