“అయినను పోయి రావాలె హస్తినకు”.. కేటీఆర్ ట్వీట్ వైరల్

ఢిల్లీలో ఆదివారం జరిగిన నీతి అయోగ్ మీటింగ్ ను బహిష్కరిస్తున్నట్లు తెలంగాణ ముఖ్యమంత్రి కేసీఆర్ ప్రకటించిన విషయం తెలిసిందే. కేంద్ర ప్రభుత్వ వైఖరి పట్ల నిరసన తెలియజేయడానికి ఈ నిర్ణయం తీసుకున్నట్లు ముఖ్యమంత్రి మీడియా సమావేశంలో తెలియజేశారు. ఇదే విషయాన్ని ప్రధాని మోదీకి లేక ద్వారా తెలియజేశామని తెలిపారు. అయితే కెసిఆర్ తీసుకున్న ఈ నిర్ణయంపై స్పందిస్తూ ప్రొఫెసర్ నాగేశ్వరరావు ట్వీట్ చేశారు.

ముఖ్యమంత్రి కేసీఆర్ కూడా నీతి అయోగ్ సమావేశంలో పాల్గొని..ప్రధాని, సీఎంల సమక్షంలో నీతి అయోగ్ ని ప్రశ్నించి ఉండాల్సిందని నాగేశ్వరరావు అభిప్రాయపడ్డారు. అయితే నాగేశ్వరరావు చేసిన ఈ ట్వీట్ పై మంత్రి కేటీఆర్ స్పందిస్తూ రీ ట్వీట్ చేశారు. ” అయినను పోయి రావాలె హస్తినకు అనేది పాత సామెత నాగేశ్వర్ గారు. ఈ కేంద్ర ప్రభుత్వం ఒక పక్షపాత, విపక్షపూరితమైన మనస్తత్వంతో గతంలో నీతి అయోగ్ సిఫార్సు బుట్ట దాఖలు చేసింది. నేతి బీరకాయలో నెయ్యి ఎంత ఉందో.. నీతి అయోగ్ లో నీతి కూడా అంతే”. అంటూ ట్వీట్ చేశారు.