కాంగ్రెస్ పార్టీ మేనిఫెస్టో విడుదల కు ముహుర్తం ఫిక్స్‌ అయింది. తెలంగాణ అసెంబ్లీ ఎన్నికలకు సంబంధించి కాంగ్రెస్ పార్టీ మేనిఫెస్టో విడుదల చేసేందుకు రెడీ అయింది. రేపు మధ్యాహ్నం 12:30 గంటలకు హైదరాబాద్ లో కాంగ్రెస్ పార్టీ అధ్యక్షుడు మల్లికార్జున కర్గే ఆ పార్టీ మేనిఫెస్టోను విడుదల చేయనున్నారు. తెలంగాణ ఎన్నికలకు సంబంధించి కాంగ్రెస్ పార్టీ ఇప్పటికే ఆరు హామీలను ప్రకటించిన సంగతి తెలిసిందే.
అయితే మేనిఫెస్టోలో అన్ని వర్గాలను ఆకర్షించేలా హామీలు ఉండబోతున్నాయని కాంగ్రెస్ పార్టీ వర్గాలు చెబుతున్నాయి. ఇప్పటికే మేనిఫెస్టోలో చేర్చాల్సిన అంశాలకు సంబంధించి టీపీసీసీ మెనిఫెస్టో కమిటీ చైర్మన్ శ్రీధర్ బాబు నేతృత్వంలోని బృందం… తీవ్ర కసరత్తు చేసింది. మెగా డీఎస్సీ, ఉద్యోగాల భర్తీ, గల్ఫ్ సంక్షేమ బోర్డు, కల్యాణ లక్ష్మి కింద రూ. లక్ష తో పాటు తులం బంగారం, విద్యార్థులకు ఉచిత ఇంటర్నెట్ వంటి హామీలను కాంగ్రెస్ పార్టీ మేనిఫెస్టోలో పొందుపరిచే అవకాశం ఉన్నట్టుగా తెలుస్తోంది. అలాగే ప్రజా సంక్షేమమే ధ్యేయంగా మరిన్ని సంక్షేమ పథకాలకు కూడా కాంగ్రెస్ పార్టీ తన మేనిఫెస్టోలో చోటు కల్పించే అవకాశం ఉంది. అలాగే కళ్యాణ్‌ లక్ష్మీతో పాటు… తులం బంగారం ఇచ్చేందుకు కాంగ్రెస్ పార్టీ నిర్ణయం తీసుకున్నట్లు సమాచారం.
