కాంగ్రెస్ పార్టీ పై బీఆర్ఎస్ వర్కింగ్ ప్రెసిడెంట్ కేటీఆర్ మరోసారి ఘాటైన వ్యాఖ్యలు చేశారు. అసెంబ్లీ ఎన్నికల్లో కాంగ్రెస్ పార్టీ ఇచ్చినవి 420 హామీలని విమర్శించారు. కరీంనగర్ బీఆర్ఎస్ కార్పొరేటర్లతో కేటీఆర్ భేటీ అయ్యారు. ఈ సందర్భంగా ఆయన మాట్లాడారు. అసెంబ్లీ ఎన్నికల్లో కాంగ్రెస్ ఇచ్చింది ఆరు గ్యారెంటీలు కాదని.. మొత్తం 420 హామీలు ఇచ్చిందన్నారు. మేనిఫెస్టో లో కాంగ్రెస్ ఇచ్చిన 420 హామీలు అన్నీ అమలు చేయకపోతే బట్టలు విప్పి కాంగ్రెస్ నేతలను నడిరోడ్డుపై నిలబెడతామని హెచ్చరించారు.
కాంగ్రెస్ పార్లమెంట్ ఎన్నికల పేరుతో హామీల అమలును వాయిదా వేయాలని చూస్తోందని.. ఎంపీ ఎన్నికలకు ముందే ఆరు గ్యారెంటీలను అమలు చేయాలని డిమాండ్ చేశారు. బీఆర్ఎస్ అధినేత కేసీఆర్ పై తెలంగాణ ప్రజలు ఇప్పటికీ విశ్వాసంతో ఉన్నారని పేర్కొన్నారు. అసెంబ్లీ ఎన్నికల్లో ఓడిపోయినా బీఆర్ఎస్ పార్లమెంట్ ఎన్నికల్లో మెజార్టీ సీట్లు సాధిస్తోందని ధీమా వ్యక్తం చేశారు. గత అసెంబ్లీ ఓటమి పెద్ద ఓటమి ఏమి కాదని.. 39 సీట్లు రావడం చిన్న విషయం కాదన్నారు.
